Fflur Hughes yw Swyddog Gwirfoddoli Plant a Phobl Ifanc y Biwro Gwirfoddoli ac mae'n gweithio o swyddfa CAVS yng Nghaerfyrddin.  Ariennir ei swydd trwy Cychwyn Cadarn a'r Bartneriaeth Plant a Phobl Ifanc (PPI), i roi cefnogaeth i'w prosiectau.

Mae'r prosiectau'n cynnwys: HomeStart, Cychwyn Cadarn, Cynllun Mentora, Canolfannau Teulu a sawl prosiect arall (gweler isod) yn ogystal â gweithio gyda Gweithwyr Ieuenctid i hybu gwirfoddoli ymhlith pobl ifanc.  Mae gwirfoddoli yn rhan annatod o lwyddiant Cychwyn Cadarn, ac felly os oes diddordeb gennych mewn gwirfoddoli gydag unrhyw un o'r prosiectau, cysylltwch â Fflur yn swyddfa Caerfyrddin.

Cychwyn Cadarn Sir Gaerfyrddin

Mae'r Bartneriaeth Cychwyn Cadarn yn credu bod teuluoedd yn ganolog i lwyddiant y Cynllun Cychwyn Cadarn, ac ystyrir adeiladu cynhwysiant gyda theuluoedd, ac o fewn cymunedau, yn elfennau hanfodol os yw'r Cynllun yn mynd i fod yn gynaliadwy.  Mae aelodau ifancach ein cymuned yn haeddu'r dechrau gorau mewn bywyd, o fewn amgylchedd diogel, er mwyn sicrhau'r cyfleoedd gorau mewn bywyd.

Mae'r Cynllun yn ceisio darparu rhwydwaith y gall pob rhiant sydd angen cymorth gysylltu ag ef, ar draws y sir, gydag ystyriaeth briodol i'r ardaloedd hynny y nodwyd bod eu hanghenion yn gofyn am adnoddau ychwanegol.  Mae'r Cynllun hefyd yn cydnabod bod plant ag anableddau neu oedi yn eu datblygiad angen cefnogaeth ychwanegol yn ystod eu blynyddoedd cynnar, sy'n ychwanegol at yr hyn sydd ar gael i bob plentyn.

Am fwy o wybodaeth am Gychwyn Cadarn Sir Gaerfyrddin, ewch at wefan Partneriaeth Plant Sir Gaerfyrddin.